جنت اور دوزخ کے بارے میں اہم انتباہ

حضرت ابوہریرہ رضی اللہ تعالیٰ عنہ سے روایت ہے کہ رسول اللہ صلی اللہ علیہ وسلم نے بیان فرمایا: جب اللہ نے جنت کو بنایا تو اپنے مقرب فرشتے جبرئیل علیہ السلام سے فرمایا کہ تم جاؤ اور اس کو دیکھو، کہ میں نے اس کو کیسا بنایا ہے، اور اس میں کیسی کیسی نعمتیں پیدا کی ہیں، چنانچہ وہ گئے اور انہوں نے جا کر جنت اور اس میں راحت و لذت کے ان سامانوں کو دیکھا، جو اللہ تعالیٰ نے اہلِ جنت کے لیے اس میں تیار کیے ہیں، اور پھر حق تعالیٰ کے حضور حاضر ہوئے اور عرض کیا کہ خداوند! تیری عزت و عظمت کی قسم (آپ نے ایسی حسین بنائی ہے، کہ میرا خیال ہے کہ) جو کوئی بھی اس کا حال سن پائے گا وہ اس میں ضرور پہنچے گا (یعنی اس کے حال سن کر وہ دل و جان سے اس کا طالب بن جائے گا، اور پھر اس میں پہنچنے کے لیے اپنے اچھے اعمال کرنے چاہے، وہ پوری مستعدی کے ساتھ وہی اعمال کرے گا، اور جن برے کاموں سے بچنا چاہیے ان سے پوری طرح بچے گا اور اس طرح اس میں پہنچ ہی جائے گا)۔ پھر اللہ تعالیٰ نے اس جنت کو تختیوں اور مشقتوں سے گھیر دیا (یعنی جنت کے گرد شرعی احکام کی پابندی کی باڑ لگا دی، جو طبیعت اور نفس کے لیے بہت سخت اور مشکل معلوم ہوتی ہے) اور پھر جبرئیل علیہ السلام سے فرمایا کہ اب تم جاؤ اور پھر جنت کو دیکھو، رسول اللہ صلی اللہ علیہ وسلم فرماتے ہیں کہ وہ پھر گئے، اور دیکھا اور اس مرتبہ جنت کو دیکھ کر (اللہ کے حضور) عرض کیا کہ خداوند! تیری عزت و عظمت کی قسم! اب تو مجھے یہ ڈر ہے کہ اس میں کوئی بھی نہ جا سکے گا (یعنی جنت کے حصول کے لیے جو شرعی احکام کی پابندی لگا دی گئی ہے، اس کی پابندی نفس اور نفسانی خواہشات رکھنے والے انسان کے لیے اتنی مشکل اور دشوار ہے کہ اس کو کوئی بھی پورا نہیں کر سکے گا)۔ پھر اللہ تعالیٰ نے جب دوزخ کو بنایا تو جبرئیل علیہ السلام سے فرمایا کہ جاؤ اور ہماری بنائی ہوئی دوزخ کو (اور اس میں انواع و اقسام کے عذاب کو) دیکھو، اس نے جا کر اور اس میں عذاب کے جو سامان پیدا کیے وہ سب دیکھا اور عرض کیا خداوند! آپ کی عزت و عظمت کی قسم (آپ نے دوزخ کو ایسا بنایا ہے کہ) جو کوئی بھی اس کا حال سن لے گا وہ اس میں نہ جائے گا (یعنی ایسے کاموں کے پاس نہیں جائے گا جو انسان کو دوزخ میں پہنچانے والے ہیں) اس کے بعد اللہ تعالیٰ نے دوزخ کو نفسانی خواہشوں اور شہوات اور نفسانی لذتوں سے گھیر دیا (یعنی جہنم کے گرد اس نفسانی خواہشات والے وہ اعمال کر دیے جن میں انسان کی طبیعت اور نفس کے لیے بڑی کشش ہے، جہنم کی گویا کہ اس کی باڑ لگا دی گئی) اور پھر اللہ تعالیٰ نے جبرئیل علیہ السلام سے فرمایا کہ جاؤ اور اس دوزخ کو پھر جا کر دیکھو، رسول اللہ صلی اللہ علیہ وسلم فرماتے ہیں کہ جبرئیل علیہ السلام پھر گئے اور جا کر دیکھا اور آ کر عرض کیا، خداوند! آپ کی عزت و جلال کی قسم! اب تو مجھے یہ ڈر ہے کہ سب انسان اسی میں نہ پہنچ جائیں، (یعنی کہ جن شہوات اور لذتوں سے آپ نے جہنم کو گھیر دیا ہے، ان میں نفس رکھنے والے انسانوں کے لیے اتنی زبردست کشش ہے کہ ان سے رکنا بہت مشکل ہے، اور اس لیے خطرہ ہے کہ بے چاری ساری اولادِ آدم نفسانی لذتوں اور شہوتوں کی کشش سے مغلوب ہو کر دوزخ ہی میں نہ پہنچ جائے)۔ (ترمذی، ابوداؤد و نسائی)