اللہ بے نیاز ہے

حضرت ابو ذر رضی اللہ تعالیٰ عنہ سے روایت ہے کہ رسول اللہ صلی اللہ علیہ وسلم نے فرمایا: ”اللہ تعالیٰ ارشاد فرماتا ہے، اے میرے بندو! تم سب بے راہ ہو سوائے اس شخص کے جسے میں ہی راہ سمجھا دوں، اس لیے تم مجھ سے ہدایت مانگو میں ہدایت دوں گا۔ اور تم سب فقیر و مفلس ہو سوائے اس شخص کے جسے میں ہی خوش حال بنا دوں، اس لیے تم مجھ سے (خوش حالی) مانگو میں دوں گا۔ اور تم سب کے سب گناہ گار خطا کار ہو سوائے اس شخص کے جسے میں ہی (گناہ سے) بچائے رکھوں، اس لیے تم مجھ سے بخشش مانگو تمہیں بخش دوں گا۔ اور جو مجھ سے معافی کا طلب گار ہوا اور وہ یقین رکھتا ہے کہ مجھے قدرت ہے کہ میں معاف کردوں تو اسے معاف کردیتا ہوں اور مجھے (اس بارے میں) کسی چیز کی پرواہ نہیں ہوتی۔

اور فرض کرو کہ تمہارے اگلے پچھلے، زندے مردے، کچے پکے، (سب کے سب) تم میں سے کسی نہایت ہی پرہیزگار آدمی کے سا دل لے کر جمع ہو جائیں تو میری بادشاہت میں ایک مچھر کے پر کے برابر بھی اضافہ نہیں کر سکیں گے۔

اور فرض کرو کہ اگر تمہارے اگلے پچھلے، زندے مردے، کچے پکے، (سب کے سب) تم میں سے کسی نہایت ہی برے کار آدمی کے سا دل لے کر اکٹھے ہو جائیں تو میری بادشاہت میں سے ایک مچھر کے پر کے برابر بھی کچھ نہ لگا سکیں گے۔

اور فرض کرو کہ تمہارے اگلے پچھلے، زندے مردے، کچے پکے، (سب کے سب) سب ایک جگہ جمع ہو جائیں اور ہر ہر انسان اپنی آرزوؤں کی آخری حد تک مانگ لے (یعنی اپنی سب سے بڑی خواہش تک مانگ لے) اور میں ان سب کی مانگی پوری کردوں تو اس سے میرے خزانے میں اتنی بھی کمی نہیں آئے گی جتنی اگر تم میں سے کوئی سمندر میں سوئی ڈبو کر نکال لے، اور یہ بات اس لیے کہ میں بڑا کریم بڑا عالی مرتبہ ہوں جو چاہتا ہوں کرتا ہوں (یعنی مجھے کوئی نہیں پوچھ سکتا)۔ میری بخشش بھی ایک بات ہے، میرا عذاب بھی ایک بات ہے، میرا معاملہ تو یہ ہے کہ میں جب کسی چیز کا ارادہ کرتا ہوں تو اسے وجود میں آنے کے لیے کہہ دیتا ہوں تو وہ فوراً موجود ہو جاتی ہے“۔ (ترمذی)